२२ पुस, काठमाडौं । धेरै देशलाई अन एराइभल भिसा दिँदा दुरुपयोग बढेको भन्दै अध्यागमन विभागले भिसानीतिलाई पुनरावलोकन गर्न माग गरेको छ । अन एराइभल भिसा सुविधाको कारण गलत व्यक्ति पनि नेपाल भित्रिने क्रम बढेकाले अध्यागमनले नीति पुनरावलोकनको प्रस्ताव गरेको हो ।
अध्यागमन विभाग निरीक्षणका क्रममा गृहमन्त्री माधवप्रसाद घिमिरेलाई आइतबार विभागका महानिर्देशक शरदचन्द्र पौडेले धेरै अन एराइभल भिसा दिँदा विकृति बढेको भन्दै नीतिमै पुनरावलोकन गर्न प्रस्ताव गरेका हुन् । ‘नेपालीहरु श्रीलंका जान पहिले नै भिसा लगाउनुपर्छ तर उनीहरुले विमानस्थलमै सजिलै भिसा पाउँछन्,’ अध्यागमनबारे गृहमन्त्रीलाई जानकारी गराउँदै पौडेलले भने, ‘अन एराइभल भिसाको हालको सिस्टमलाई पुनरावलोकन गर्नु जरुरी छ ।’हात विश्वका ११ देशबाहेक अन्य देशका नागरिकले नेपाल आउँदा विमानस्थल तथा सीमाक्षेत्रमा नै भिसा पाउने गरेको नयाँ पत्रिकामा खबर छ । नाइजेरिया, घाना, जिम्बाबे, स्वाजिल्यान्ड, क्यामरुन, सोमालिया, लाइबेरिया, इथियोपिया, इराक, प्यालेस्टाइन र अफगानिस्तानका नागरिकले भने नेपाल आउन पहिले नै भिसा लिनुपर्ने हुन्छ ।
नेपालीलाई भने विश्वका एक दर्जनभन्दा कम देशले मात्र अन एराइभल भिसा दिने गरेका छन् । सिंगापुर, बंगलादेश, फिलिपिन्सलगायतका देशले मात्र नेपालीलाई पहिले नै भिसा लिएर जानुपर्ने व्यवस्था गरेका छैनन् । अरु देशमा जानका लागि नेपालीले पहिले नै भिसा लिनुपर्छ ।
No comments:
Post a Comment